Job 30

1 “Kodwa manje bayangihleka, amadoda angabantwana kimi, oyise engangibeyisa okokuthi ngangingeke ngibelusise lezinja zami zezimvu.

2 Amandla ezandla zabo ayengangisiza ngani mina, ngoba amadlabuzane abo ayesephelile;

3 sebejujukile ngokuswela langendlala, bazula elizweni elomileyo emimangweni eyinkangala engelalutho ebusuku.

4 Enkotheni khonale bakha imibhida emunyu, ukudla kwabo kuyizimpande zezihlahla.

5 Baxotshwa ebantwini bakibo, bathethiswa kungathi babengamasela.

6 Basebemele bahlale ezihotsheni zezifula ezomileyo, ezimbalwini emadwaleni lemilindini emhlabathini.

7 Bakhonya phakathi kwezihlahla baququbala emadenjeni.

8 Base bengabantu abaphansi abangaselabizo, sebexotshiwe elizweni.

9 “Kodwa manje amadodana abo asengihaya ngengoma; sengiyinto yokukhulumisana kubo.

10 Bayangizonda bamela khatshana lami; kabathikazi ukungikhafulela ebusweni.

11 Khathesi njengoba uNkulunkulu eselithukulule idandila lami wangithela izinhlupheko, sebeklamasa kabasazithinti.

12 Kwesokunene kwami ixuku liyangihlasela; bathiya izinyawo zami ngemijibila bakhe imibundu yokungivimbezela.

13 Badiliza indlela yami; bayaphumelela ukungidiliza kungekho obancedisayo.

14 Bahlasela ingathi bafohlela esikhaleni esivulekileyo; beza bethululeka phezu kwezinqwaba zokubhidlika.

15 Ukwesaba okukhulu kungiphethe; isithunzi sami sobuntu singathi siphethwe ngumoya, ukuvikeleka kwami kunyamalala njengeyezi.

16 “Manje impilo yami isincipha; izinsuku zokuhlupheka zingibambe nko.

17 Ubusuku bugwaza amathambo ami; lokuqaqamba kobuhlungu bami kakupheli.

18 Ngamandla akhe amakhulu uNkulunkulu unjengelembu kimi; uyangikhama ngamabheqe entanyeni yami.

19 Ungivoxela edakeni, ngicina sengiluthuli lomlotha.

20 “Ngikhala kuwe, O Nkulunkulu, kodwa kawuphenduli; ngiyasukuma, kodwa ungithapha ngamehlo kube kuphela.

21 Ungisukela ngesihluku; ungihlasela ngamandla esandla sakho.

22 Uyangihlwitha ngiphetshulwe ngumoya; ngiphoseke le lale phakathi kwesiphepho.

23 Ngiyazi ukuthi uzangilalisa phansi ekufeni, endaweni emiselwe konke okuphilayo.

24 “Ngempela kakho ombeka isandla umuntu oswelayo nxa ekhalela ukusizwa esebunzimeni.

25 Kangibakhalelanga yini labo abahluphekileyo na? Umoya wami kawubazwelanga usizi abayanga na?

26 Kodwa ngathi ngilindele ubuhle, kweza ububi; ngathi ngilindele ukukhanya kweza umnyama.

27 Ukudunguluka ngaphakathi kwami kakukhawuli; izinsuku zokuhlupheka zingijamele.

28 Ngihamba nje ngimnyama kubi, kungesikutshiswa lilanga; ngiyasukuma enkundleni ngicele uncedo.

29 Sengingumfowabo wamakhanka, umkhula wezikhova.

30 Isikhumba sami siba mnyama, siyaxathuka; umzimba wami uyatshisa ngomkhuhlane.

31 Ichacho lami selilungiselwe isililo, lomqangala wami ulindele umkhosi wokukhala.